政情：蔣麗芸自爆有繼女
火氣十足嘅立法會議員蔣麗芸（Ann）講嘢向來聲大大，好似阿媽教仔咁有威嚴，但究竟佢喺屋企幾有威嚴，外界似乎所知甚少，淨係知佢早前埋怨老公梁海明唔記得「結婚紀念日」。不過，阿Ann尋日講起本港接連發生逆子弒親嘅倫常慘案時，居然自爆育有一個「stepdaughter」（繼女），但至於佢同繼女嘅關係就不願多講。
據知，阿Ann同梁海明結婚十六年，當年結婚時已年屆四十二歲，所以有冇生兒育女嘅嘢實在好難講。對於繼女嘅一切問題，阿Ann似乎都不願多談，即使卓妮打蛇隨棍上，八卦吓佢兩母女平時點樣相處，阿Ann都封口唔講，更煞有介事咁將個波交畀身旁嘅好姊妹李慧琼（Starry）添，似乎佢相當保護呢段私隱。
Starry專心陪女 唔玩手機
經常分享湊女經嘅Starry亦好識做咁幫阿Ann解圍，慨嘆自知作為「三料議員」會好忙，但都會盡量抽時間陪囡囡傾吓偈。
佢話好多家庭即使身處同一間屋都變身「低頭族」，掛住打機、玩電話而忽略相聚時光，所以佢早已戒咗呢鋪手機癮，陪緊囡囡嘅時候點都唔會覆電話，果然係廿四孝媽咪。