政情：岑智明做「迷雲」龍友
香港天文台今年成立一百三十周年，將會舉辦連串活動慶祝。台長岑智明尋日同傳媒茶敍時，就好興奮拎咗本即將派畀中小學嘅《百變雲彩》圖書出來，原來入面收錄咗台長嘅私人珍藏。話說幾年前佢仲喺尖沙咀美麗華寫字樓工作嘅時候，有兩次畀佢捕捉到罕見嘅「莢狀雲」同「貓眼雲」珍貴畫面，佢笑笑口話，香港暫時只有呢兩舊雲嘅雷達影像，換言之係相當珍貴。
岑智明透露，曾經試過去大嶼山成日，就係為咗等特別嘅雲出現，佢依家會隨身帶備數碼相機，因為一舊雲由出現到消失只需要兩秒，一瞬即逝，所以甘願為舊雲而做龍友！不過，近期佢為咗籌備今年七月至九月舉行嘅天文台歷史展覽，忙於四出搵展品同聯絡本地收藏家，本來仲想問英國科學博物館借番開台用過嘅赤道儀，但基於安全理由而告吹，感到有點失望。
自費購仿製維港俯瞰圖
為咗搞好個展覽，岑智明自掏腰包花幾百蚊買咗兩張十九世紀仿製維港俯瞰圖，可以見到天文台開台時所在地。佢講笑話真迹太貴買唔起，希望市民能體諒佢嘅心意，由唔同角度認識香港天文台喎！