政情：「鄧國威應去針灸洗腦」
中醫治療近年愈來愈受歡迎，但原來政府作為本港最大嘅老闆，十七萬公僕若選擇睇中醫，只可以報銷病假紙，但診金要自付。點知工聯會三子，王國興（王仔）、鄧家彪同郭偉強就有強烈反彈，王仔除咗力數政府思想落後，更揶揄公務員事務局局長鄧國威「要去針灸一下！」火藥味濃過煲中藥！
立法會公務員及資助機構員工事務委員會尋日開會，討論將中醫服務納入公務員醫療福利體制。負責議題嘅鄧國威解釋，現時中醫診所唔係隸屬衞生署，兼以自負盈虧方式營運，未被納入政府常規服務之列。佢更多口形容，中醫係「非正統」服務，所以無緣同政府西醫及牙科服務「平起平坐」，報銷中醫診費免問。
鄧國威呢番「中醫非正統」嘅開場白，即時辣慶工聯會三位議員，鄧家彪先批評政府帶頭漠視市民對中醫嘅需求，促請衞生署興建中醫診所。王仔就接力大讚中醫歷史源遠流長、絕對正統，力斥鄧國威言論「政治不正確」，要求對方收回言論。郭偉強亦發炮鬧當局對中醫雙重標準，要求「攞局長個腦洗一洗」，贏咗一場漂亮嘅口水仗。
鄧承諾檢討政策
無端端被「針灸」兼「洗腦」嘅鄧國威就急忙補鑊，除咗澄清自己絕冇歧視中醫外，為咗息事寧人惟有承諾會檢討過時政策，但時間表、路線圖欠奉。委員會最後喺六票支持，零票反對下，通過無約束力議案，促請政府立即檢討冇為公務員提供中醫藥服務嘅過時政策。
其實政府近年都大力推動中醫藥發展，好似成立中醫藥發展委員會，力圖再一次打造「中藥港」，就連浸會大學亦睇準中醫院嘅市場，同政府隔空力爭九龍塘前李惠利院校地皮，可見中醫喺港人心目中嘅地位愈來愈重要。既然政府願意來年增加公務員西醫福利開支兩成，點解唔考慮畀全港公僕多一個選擇？鄧國威今次被議員針灸兼洗腦都唔係冇道理o架！