中環出更：周國豐夫婦拍拖 茶記醫肚

香港人工作緊張，食無定時，做律師嘅社交界名人周國豐（Brandon）同太太黃泳霖（Jenny）都係咁急趕。早幾日下晝約三點鐘，卓妮見到Brandon夫婦現身皇后大道中，兩人手拖手，施施然過馬路，然後行入士丹利街一間茶餐廳，坐低叫嘢食。原來兩人忙到飯都唔得閒食，於是相約到茶餐廳醫肚，午餐同下午茶一次過搞掂。
周國豐（左）同太太黃泳霖（右）十指緊扣過馬路。（陳嘉順攝）
周國豐（左）同太太黃泳霖（右）十指緊扣過馬路。（陳嘉順攝）

當日Brandon着到官仔骨骨，太太就着得好輕便，兩人沿途有講有笑，好溫馨。自細喺英國長大嘅Brandon，手上拎住一個印滿英國米字旗嘅手挽袋，繼續貫徹佢嘅英式風情。兩人入咗茶餐廳之後，見佢哋同侍應好好傾，落咗柯打後坐低等食物期間，佢哋發現咗卓妮行蹤。Jenny話，佢哋啱啱做完嘢，仲未食飯，所以特登約埋去幫襯茶餐廳。

忙緊睡床用品代理

Brandon話，最近忙緊兩間英國及法國睡床用品代理生意，始終今次係佢首次做生意，好多細節要跟到足，所以比較忙啲。由於首次營商成績唔錯，所以佢打算做埋時裝代理，咁係咪佢至愛嘅英國牌子？Brandon賣關子話，暫時唔講得喎！

二人沿途有講有笑。
  • 二人沿途有講有笑。
二人前後腳入咗茶餐廳。
  • 二人前後腳入咗茶餐廳。
周國豐（前）及太太黃泳霖（後）發現卓妮行蹤，友善打招呼。
  • 周國豐（前）及太太黃泳霖（後）發現卓妮行蹤，友善打招呼。

復活節將至，Brandon預告將同太太及一對寶貝兒子到新加坡玩。早前佢同太太、三歲大仔喺英、法返港，佢爆料話，大仔喺英法玩得好開心，因為見到落雪，又有得搭船，但細仔冇同行，希望復活節時補番數喇！

卓妮

第一手消息請下載on.cc東方互動iPhone/iPad/Android/Windows Phone Apps