國內同胞帶多一罐奶粉出境啫，搞到要拉要鎖又要罰，表面上好似嚴苛得好荒謬，實際上有迫不得已嘅理由。尋日喎，有三個內地人違反三月一日開始生效嘅限帶奶粉出境條例，喺沙田裁判法院被判處罰款一千至二千五百元，其中一個男被告認為，來港多買一罐奶粉都唔准，好鬼死麻煩啫。
根據新實施嘅限奶令，任何十六歲人士每日只准攜帶兩罐奶粉出境，一超額就要面對法律制裁。食物及衞生局局長高永文就話嘞，限制奶粉出境係要確保本地父母嘅嬰兒獲得足夠嘅奶粉供應，呢個係唯一嘅出發點，並非針對自由行旅客，希望香港市民同內地民眾理解及諒解。保安局局長黎棟國指出，新例實施之後總共拘捕八十七名涉及攜帶超額奶粉出境嘅人士，香港人同內地人嘅比例係六比四。
對於高永文嘅講法，感受到切膚之痛嘅香港市民當然理解啦，問題係內地民眾未必諒解。內地官方媒體甚至質疑「香港人變得對掙錢懶惰和不敏感」，一口咬定香港政府反應過激，限奶令猶如「聯合國禁運」。簡單咁講，原本已經愈來愈尖銳嘅中港矛盾，家陣由於限制奶粉出境而變得更加狗咬狗骨。
其實計功夫茶話齋，罪魁禍首始終係見錢開眼嘅國產貪官，否則唔會縱容出咁多見利忘義嘅毒奶粉供應商。喂，如果唔係中國製造嘅劣質奶粉毫無信心保證，又點會有咁多水貨客來港大手入貨呀？又點會害到本地媽媽「無乳問蒼天」呀？內地網民與其臭罵香港政策制訂者「絕子絕孫」，不如掉轉槍頭直搗禍源，鼓其如簧毒舌痛斥國家領導人冇好好監管內地嘅食品問題。冇錯，神州大地嘅食品問題五花八門，毒奶粉只係其中之一。假如有一日坑渠油徹底攻陷內地市場，功夫茶相信水貨客必定會爭先恐後來港搶購食油，情況足以媲美當日用以抵抗輻射嘅「急性盲搶鹽」。
即係咁，冇貪官就冇奸商，冇奸商就冇毒奶，冇毒奶就一天都光晒，最低限度中港矛盾唔會變得咁白熱化吖嘛，中華兒女毋須計較你係蝗蟲我係狗。兄弟鬩牆咁老套嘅家醜，傳出江湖鬧笑話啦。
講真吖，治亂世確係要用重典，限奶令唔嚴苛唔得o架，否則慣於螞蟻搬家嘅水貨客睬你都傻。正所謂解鈴還須繫鈴人，要化解中港矛盾必須從反貪防腐入手。大家不妨幻想一下，中華大地唔再有黑心食品，國產奶粉每一罐都係餵到小寶寶肥肥白白嘅優質正貨，內地同胞理得你點樣限制奶粉出境吖，極其量係笑你畫地為牢，而唔係鬧你心狠手辣。
一句到尾，貪官奸商不死，中港矛盾不滅。