港區全國人大代表嘅工作向來都好神秘，係咪幫到港人發聲實在令人懷疑。公共專業聯盟立法會議員莫乃光（Charles）同梁繼昌早前就做咗個實驗，去信三十六位港區人大代表，要求佢哋跟進一系列嘅中港矛盾問題，點知就淨係得陳智思（Bernard）一位人大代表書面回覆。Charles都試過喺一啲場合問過其他人大代表有關上述問題，點知佢哋就連有冇收咗封信都唔知，唔怪得Charles要喺社交網站公開多謝Bernard喇。做咗白老鼠嘅Bernard喺回信中話，佢同眾多港人一樣，好關注內地訪客對本港居民生活造成嘅影響，所以會藉今次到北京參與人大會議向相關機關提出關注。