泛民主派正積極研究由香港大學法律學者戴耀廷提出嘅「佔領中環」行動，計劃藉此迫使中央同特區政府落實真普選。政制及內地事務局局長譚志源（Raymond）尋日被問及有關問題時，突然自爆戴耀廷係佢嘅大學同期同學，又話早前先喺一個公開場合見過對方，期間談及性傾向歧視問題，但偏偏就冇講「佔領中環」。Raymond無喇喇重提同戴耀廷喺幾十年前嘅關係，莫非係想對方手下留情放棄推動「佔領中環」？如果兩人真係咁老友，點解又唔直接同對方講呢？睇嚟兩人只係泛泛之交啫。
