政情:局長校長謝絕中產咖啡

財爺曾俊華一句「飲咖啡、睇法國電影嘅人係中產」,為中產階級注入後現代定義,但唔係人人都認同呢個講法,好似勞工及福利局局長張建宗(小肥張)同中文大學校長沈祖堯,雖然二人生活無憂,但就不約而同向中產咖啡說「不」。沈祖堯除咗自稱出生基層同對咖啡冇要求外,小肥張更斷言唔愛咖啡、獨愛中國茶,更自稱只係公僕一名,誓要同「中產」劃清界線!

曾經有同學群起反對國際連鎖咖啡店進駐校園嘅中大,尋日就有首間由社會企業「新生精神康復會」營運嘅咖啡店喺校園內開幕,主打本地烘焙咖啡、有機豆漿等健康輕食,並邀請小肥張同沈祖堯等人撐場。原來小肥張嘅飲食之道相當簡單清淡,最鍾意飲中國茶,身邊嘅人更透露佢平時返工飲得最多嘅係暖水添。

唔同財爺坐埋一條船

照咁睇小肥張似乎唔符合財爺嘅中產定義喎,小肥張一聽見「中產」兩個字,即時耍手擰頭,自稱只係服務市民嘅公僕,點都唔肯同財爺坐埋同一條船。不過,據知月薪逾三十萬元嘅小肥張,同妻子在港持有八個物業,其中六項用來收租,咁多樓揸手,相信好多中產都望塵莫及喇。

鍾意飲咖啡唔算中產

另邊廂,沈祖堯就笑言對咖啡冇乜要求,即使係三合一即溶呢類平民咖啡都照飲可也,但有感近日風頭火勢嘅佢亦不忘補充,鍾意飲咖啡唔算得上係咩中產,更自稱「我出生其實都唔係中產喎」!照咁睇,小肥張同沈祖堯喺依家風頭火勢敏感時刻,都唔敢飲呢杯「中產咖啡」,以免惹是非上身。

對比咖啡,沈祖堯對甜品嘅興趣似乎更大,但佢尋日喺咖啡店望住多款蛋糕眼眨眨,最後影咗相就當食咗,究竟有咩苦衷?沈祖堯解釋,愛女投訴佢又肥咗,除咗勒令佢逢星期一食齋減肥外,佢亦決定的起心肝每星期抽時間打網球,打走脂肪。咁目標減幾多磅?佢就話希望一年減十磅,怕減得太快易反彈喎!

第一手消息請下載on.cc東方互動iPhone/iPad/Android/Windows Phone Apps