中環出更：蔡伯勵話香港流年無大礙
堪輿大師蔡伯勵有十一個子女，排行第二嘅蔡爾雅就擅長絹畫創作，早年曾經喺比利時定居，依家就住喺順德推動文化產業，佢近日喺文化中心搞咗個畫展，將畫展賣畫收入捐贈畀東華三院。尋日畫展開幕，蔡伯勵都有出席支持，難得見到蔡大師，卓妮梗係叫佢贈兩句香港流年運程啦！佢話，雖然今年流年有阻滯，但整體冇乜大礙。
蔡伯勵家族嘅蔡真步堂依家已傳到第四代，由女兒蔡興華當家。早前蔡興華曾經批算特首梁振英（CY）十年大運已過，蔡大師尋日就打圓場話，CY生肖屬馬，今年有吉星照耀，冇咩大問題，又話運程嘅嘢仲有好多環境因素影響，即使市民對CY認識不足，但相信以CY嘅能力同個人意志，市民嘅睇法會慢慢改變。
為女兒打圓場
蔡興華當時話，十年前CY嘅運程比較燦爛，今年就平淡啲，但佢只係以CY個人嘅角度批測。不過，爸爸就以生肖觀點批算，屬馬嘅CY今年運程唔錯，有太陽星高照，萬事皆可雨過天青，逢凶化吉。