中環出更：馮卓能 鮑誠業帶中學生出法

仁濟醫院早前舉行周年慈善餐舞會，為幫助在囚人士未成年子女嘅「仁濟明日更生慈善基金」籌募經費。卓妮現場見副主席馮卓能（Clement）同總理鮑誠業（Sammy）企埋一邊密密傾，原來佢哋將會喺本月底帶仁濟醫院靚次伯紀念中學嘅學生到法國交流，仲會趁機到酒莊參觀，令學生開吓眼界。
馮卓能（右）及鮑誠業（左）將帶隊出訪法國。
馮卓能（右）及鮑誠業（左）將帶隊出訪法國。

Clement擔任校董兼校監，而Sammy就係校董，所以兩兄弟拍住上做領隊。Clement話，今次行程十幾日，除咗同當地中學生交流外，仲會去靚次伯酒莊（Chateau Lynch-Bages）參觀。Sammy就夠晒頻撲，事關佢去法國前會先同太太去加拿大睇北極光，原來農曆新年佢哋去咗芬蘭、挪威十幾日，諗住見識極光之美，可惜天氣惡劣，失望而回，希望今次去加國可以一償所願。

何芷韻會多留港

當晚仁濟主席鄭承隆及籌委會主席蘇陳偉香一早到場招呼賓客，前仁濟主席李文斌太太何芷韻（Amanda）、鄧肇殷及王賢訊夫婦等一眾總理都有到場。經常喺內地打理生意嘅Amanda話，下月將會加入一間慈善機構，日後會多啲時間留喺香港，仲應承會經常返仁濟探老友添。

仁濟靚女多，左起：何芷韻、王賢訊太太朱穎詩、鄧肇殷及周德興總理嘅新婚太太Grace。（余素月攝）
  • 仁濟靚女多，左起：何芷韻、王賢訊太太朱穎詩、鄧肇殷及周德興總理嘅新婚太太Grace。（余素月攝）
鄭承隆（左一）及蘇陳偉香（右二）發力籌款，懲教署署長單日堅（右一）及六福集團副主席謝滿全（左二）齊支持仁濟籌款。
  • 鄭承隆（左一）及蘇陳偉香（右二）發力籌款，懲教署署長單日堅（右一）及六福集團副主席謝滿全（左二）齊支持仁濟籌款。

卓妮

第一手消息請下載on.cc東方互動iPhone/iPad/Android/Windows Phone Apps