港產官僚曾經公開話過，求學唔係求分數。你信唔信吖？信就錯喇，香港嘅教育制度根本就係分數至上，考試成績差啲咋，想搵學校收留都幾難，即使你就讀嘅係「一條龍」學校，一樣冇人情講o架。
唔係功夫茶亂噏，教育局建議日後嘅升中派位，取消現行「一條龍」中學必須全面接收其連繫小學小六生嘅做法，學校有權要求成績欠佳小六生留級，甚至可以拒絕直升中一添。即係話，「一條龍」學校面臨「斷龍」，估計每年至少有二千名升中學生受影響，搞到家長無所適從，直斥當局本末倒置，冇嗰樣整嗰樣。
喺現行政策之下，「一條龍」中學必須錄取其連繫小學所有選擇直升中學嘅小六畢業生，學校唔可以安排小六學生留級。呢種辦學模式已推行十年，受到唔少家長同學生歡迎，當局一聲斷龍，當堂打破學生直升夢，唔徬徨就假。正如有家長團體話齋，安排子女入讀「一條龍」學校，目的係希望子女完成小學後直升連繫中學，毋須冒險，亦毋須頻頻撲撲搵中學，家陣准許「一條龍」中學拒收成績欠佳小六生，變相取消安全網，為學生製造雙重關卡，亦為家長製造恐慌。
即係咁，改變一條龍制度，無疑可以提升收生水平，降低學生嘅學習差異，同時亦可以體現公平原則，唔使畀人批評對外校學生唔公平。問題係，究竟乜嘢成績需要留級？邊個決定學生留級？學校同家長都一無所知，教育局唔搞清楚呢啲問題，盞引發爭拗搞到天下大亂嘅咋。
講開又講，香港教育問題多多，一向唔公平，點只「一條龍」制度要檢討吖。例如官津名校採取世襲制，剝奪其他學生入讀心儀學校嘅機會，根本就係如假包換嘅封建制度。本來呢，學校收生應該根據成績擇優取錄，而世襲制就以學生家庭背景為首要準則，結果權貴子女世世代代入讀名校，而貧窮子弟只能望門興嘆，咁樣叫公平咩？咁樣叫有教無類咩？
仲有吖，近年傳統名校紛紛轉為直資學校，一邊接受公帑資助，一邊收取昂貴學費，變相將貧窮子弟拒諸門外；加上香港出生率一直偏低，當局一刀切減班減位，官津名校學位買少見少，進一步降低基層子弟接受優質教育嘅機會，擺到明歧視貧窮。
講到尾，教育制度唔公平，根本就係港府一手造成。解鈴還須繫鈴人，如果當局拆散「一條龍」係為咗顯示公平原則，咁唔該同時改變名校世襲制嘞，呢啲製造跨代貧窮嘅教育制度，早就應該送去堆填區喇！