鬍鬚曾每年財政預算的例行派糖，已完全沒有驚喜，你聽就當催眠，睇吓啲高官議員有唔少瞓到口擘擘就知喇！之不過鬍鬚曾一句「我都係中產」就一石激起千重浪，全城議論紛紛，熱鬧過巴西嘉年華，有聽眾問佢是否會覺得自己激怒中產，鬍鬚曾連解釋中產係一種生活態度——得閒飲咖啡睇法國電影，或去茶樓食熱騰騰嘅蝦餃都費事，佢話：「不如，有沒有一些較實在的問題。」
其實，講真喇，「一些較實在的問題」你呢個年薪四百萬嘅「中產」都係解決唔到o架啦！既然唔係睇收入、身家定中產，咁執完紙皮廢紙嘅老人家，去買杯咖啡又榮升「中產」，老朽塗完篇稿，又約阿二在陋室睇套嘉芙蓮丹露嘅《秋水伊人》或阿倫狄龍嘅《師生緣未斷》，哇哈，老朽霎時又變回「中產」，叻過變色龍，問你服未？
「五四」前後，社會動盪，民生凋蔽，在「有槍就是草頭王」的戰亂時代，大多數知識分子感懷身世，著名小說家郁達夫便在《零餘者》（即多餘的人）小說中感嘆：「我是一個真正的零餘者……我讀書學術，到了現在，還不能做出一點轟轟烈烈的事業來，就是這麼幾塊錢……還是昨天從母親那裏寄出來的，我對於母親有甚麼用呢？」
郁達夫感到莫名的悲涼，相信就是不懂得調節「生活態度」，不懂拿幾文稿費買杯咖啡，看看法國電影，抵佢心理唔平衡，要「沉淪」下去，佢喺小說裏頭嘅表白，直情係個「憤青」，佢大聲吶喊：「對於這樣混亂的中國，我竟不能製造一個炸彈，殺死一個壞人！」
老朽呢個「中產」本覺得個世界都好灰，不過聽咗鬍鬚曾嘅「肺苦」之言，剎那間海闊天空，真有「一句真話能比整個世界都重，一個夢想能讓生命迸射光芒」的暗喜，鬍鬚曾幾時賞面，等老朽請你飲杯咖啡暢談中產人生好逍遙！