政情：北上做專業管理 孫大倫好橋贈港青
中港照相器材主席孫大倫（Dennis）去年九月將上市公司交畀大仔孫道弘接手後，半退休嘅日子樂得清閒，佢除咗負責集團策略性發展外，又投身做社會公職，早前就接任香港管理協會會長。原來Dennis曾經喺美國做過藥劑師，後來奉父命回港接手家族生意，幸好自己對攝影興趣濃厚，所以先至開心做到依家。
難忘遊黎巴嫩狂影相
將心比己，Dennis明白時下好多年輕人唔想接手家族生意，好似佢嘅細仔就係好例子，所以佢諗到條好橋，幫八、九十後港青搵出路，就係返內地做專業管理人。佢話內地近二十年冒起唔少白手興家嘅大企業，但喺一孩政策下，而第二代又冇興趣接手家族生意，所以香港應該培養大批專業管理人才，返內地做專業管理嘅「打工皇帝」。
Dennis喜歡旅行，記得影相最多嘅一次，係去中東黎巴嫩旅行，四日內狂影二千幾張。至於影得最開心嘅一次竟然係喺香港，話說有次佢帶外地朋友乘坐直升機，諗住畀好友一次過飽覽香港美景，點知俯瞰香港原來咁靚，於是佢機不離手影足全程，至今諗起都意猶未盡。