政情：唔識安迪華荷？葉建源開口即露底
普普藝術（Pop Art）大師安迪華荷（Andy Warhol）亞洲巡迴展近期巡到嚟香港藝術館，吸引咗好多平時唔太留意藝術展嘅市民都畀錢入場，睇吓呢位大師嘅作品。正當大家以為香港藝術普及有望之際，立法會教育界議員葉建源尋日就問：「咩『荷』話？」
尋日喺一個財政預算案論壇上，有觀眾大嘆香港做得太少藝術教育工作，建議政府應該多撥資源普及藝術，並多做創意藝術教育。葉建源呢位教育界代表一聽到「教育」同「太少」，就梗係要回應番兩句啦，不過平時講嘢溫文爾雅、立場強硬嘅佢講講吓就露底問咗一句：「咩『荷』話？」唔知佢係聽唔清楚，定真係唔識Andy Warhol何許人也。
不過，葉建源就從容不迫繼續回應話，政府對教育界資源投放不足，令好多教師未有受過藝術教育培訓，就要走出嚟充撐教書，即使有培訓都只係水過鴨背。
拖視覺藝術老師落水
葉建源仲話，原來大家小學時教視覺藝術嗰位老師，極可能好多都冇讀過視覺藝術，各位小學雞聽日返學，不妨又「挑機」問吓視覺藝術老師識唔識Andy Warhol吖！