政情：黃以謙覓官場新血路
九龍城區議員兼精神科醫生黃以謙去年應徵過食物及衞生局副局長、又參選過立法會，可惜最終無功而還，原來佢又有新動向，就係即將加入民建聯（民記）。民記有唔少黨員都成功加入政府做官，而黃以謙又一直做官心切，今次入黨會否諗住有較大機會加入政府做官呢？
黃以謙尋日現身民記九龍城支部新春團拜，支部主席徐紅英致詞時就同街坊透露，九龍城區議員黃以謙即將會加入民記。就現場所見，黃以謙唔單止坐喺主家席，仲有份上台做主禮嘉賓切燒豬添，恍如一家親。不過，當我哋問黃以謙幾時同民記接觸時，佢就話仲未成事，唔想喺度講喎。
多年前已雄心勃勃
黃以謙多年前做自由黨區議員嘅時候，已經雄心勃勃，好想參選立法會，可惜佢當時就冇運行，又未獲黨重用，仲被黨主席暗寸過佢知名度低添！不過，當佢喺○八年毅然退黨後，反而有運行，撈番個市區重建局嘅非執董職位。後來佢又加入立法會議員梁美芬嘅西九新動力同唐英年「家臣」林大輝嘅C18社區組織，仲喺特首選舉時幫過候選人唐英年助選添。
梁振英出任特首後，新政府為聘請副局長舉行公開招聘，當時盛傳得到醫學會推薦嘅黃以謙都有應徵，但最終都係石沉大海。黃以謙今次加入民記，仲要係超級「梁粉」蔣麗芸（Ann）嘅九龍西陣地，如果話佢係想藉住加入民記搭路入政府做官，都未必冇可能，相信只係時間上嘅問題。
民記有唔少人入咗政府做官，包括尋日都有出席團拜嘅運輸及房屋局局長張炳良、輸都變贏嘅政制及內地事務局副局長劉江華、民政事務局政治助理徐英偉等，而且仲有啲未曝光嘅副局長同政助人選。所以話呢，如果黃以謙真係想做官嘅話，過去兜兜轉轉真係行咗好多冤枉路，依家總算有望殺出一條官場嘅新血路。