中環出更：人大新丁陳勇 上京開會大陣仗
全國人大會議後日開幕，港區人大代表尋日啟程上京。新一屆港區人大有近半新丁，所以佢哋顯得零舍緊張，為準備會議做足研究外，亦帶備唔少資料到北京作參考。其中人大新丁、新界社團聯會理事長陳勇，除咗潤膚霜、潤喉糖同保暖衣物外，佢仲帶備文件同手提電腦，就連打印機都帶埋，好似搬咗個辦公室上京咁，認真誇張。
陳振彬入完馬場先出發
兩會會期長達兩星期，往年好多人大政協都攜眷上京，但卓妮發現今年好似少咗呢個情況，可能啲新丁未熟環境。不過，作為港區人大新丁嘅菱電發展主席胡曉明（Herman）就有太太梁子慧陪同上京。Herman話，佢太太喺北京有好多朋友，就算佢開會兩星期，太太都唔會悶喎。
尋日搭同一班機嘅港區人大只有十多人，即係好多人都冇跟大隊上京，其中一個就係九龍社團聯會會長陳振彬（Bunny）。卓妮尋日下晝喺沙田馬場見到Bunny，佢話因為早上有區議會會議，所以改搭下午五點半鐘飛機上京，見中途又有時間，所以咪入場支持吓愛駒「傳奇快車」囉。不過，「傳奇快車」最後都跑唔出，唔知Bunny會否後悔不如早啲上京好過呢？
卓妮