中環出更：廠商會春茗 人人開心「受罰」
農曆正月未過，春茗繼續來，日前輪到中華廠商聯合會搞春茗，商會成班員工齊齊玩番晚。晚宴嘅抽獎項目係由各會董捐出，會長施榮懷（Irons）帶頭奉獻一萬元，而出晒名玩得嘅董事局成員，當晚齊齊挑戰近日城中熱門嘅「一分鐘遊戲」，遊戲規則係贏咗冇獎，輸咗就要罰錢當抽獎獎品，副會長同會董們好識做，玩遊戲刻意失手等科水。
當晚大家玩得好肉緊，吳永嘉、徐炳光、楊志雄等副會長大戰「抽筋擒拿手」遊戲，玩法係要將鉛筆由手背拋起，然後喺半空中接住，筆嘅數目每次遞增。其實大家身手本來都好敏捷，但紛紛刻意「失靈」跌筆受罰科水，個個被罰都咁開心。常務會董沈運龍就開金口獻唱日文歌，各部門主管化身人肉樂器伴唱，氣氛好熱鬧。
Irons話，員工係商會最寶貴嘅資產，所以每年都要慰勞佢哋，咁識體諒員工，認真唔話得。展望蛇年經濟，佢希望市道一路向好，個個賺大錢。
施榮懷開會減飲宴
Irons升呢做政協委員赴京開兩會，佢話爸爸施子清贈佢「勤力」兩個字，難怪佢話要減少飲宴，將精神專注開會喇。
卓妮