店舖堆貨阻路食署執法乏力
「啲紙箱堆到成座山咁高，又擺晒啲貨出嚟，塞住晒條路，叫人點行？」大埔居民林小姐指出，大光里一帶有店舖常將貨物堆放行人路上，令本已狹窄的通道更見水洩不通，要求食物環境衞生署加緊巡察。
食環署發言人指出，當局一向關注上址一帶店舖違例擴展營業範圍情況，並不時進行日常巡查及突擊行動，一旦發現店舖於公眾地方擺放物品造成阻礙，將因應實際情況向店舖負責人發出口頭警告或提出檢控。發言人稱，過去一年共接獲十七宗相關投訴，並提出逾一百四十宗檢控。
不過，林小姐卻指現時上址阻街情況仍毫無改善，不滿食環署執法力度欠奉，無助遏止違規行為，「如果一年檢控咁多次啲舖頭都唔驚，咁係咪應該檢討下，諗啲真係有用嘅方法去解決問題？」