春節期間，內地旅客被迫瞓旅遊巴嘅醜聞搞到滿城風雨，依家仲有續聞。呢，當局以保障公眾利益為由，暫停世通假期牌照，直至完成調查為止。旅行社待客不周，令香港聲譽嚴重受損，都算自食其果咯。
出得嚟行，預咗要還，旅行社被釘牌係意料中事，問題係，旅客利益係咪真係從此得到保障呢？旅遊業係咪從此冇醜聞呢？梗唔係啦，旅遊業亂象叢生，禁之不絕，就算釘咗一間世通，仲有千千萬萬間世通。大家可以由今次事件睇到，業界劏客手法五花八門，層出不窮，再咁落去，今次旅客被迫瞓旅遊巴啫，下次難保唔會被迫瞓街！
面對旅遊業亂象叢生，當局有乜對策呢？旅遊事務專員容偉雄話喎，當局絕不姑息任何影響本港旅遊業聲譽嘅行為，已責成旅遊業議會加強規管內地旅行團，檢討現行嘅規管十招咁話。
唉，遲唔遲啲吖，規管十招擺明漏招，早就要檢討啦。歌仔都有得唱，玩得招積，住得舒適。十招之中居然無半招監管旅行團住宿安排，畀不良業界乘虛而入，唔使獲酒店確認訂房就可以膽粗粗接團，咪即係搵旅客較飛！
仲有呀，叫旅議會加強規管業界喎，即係叫隻無牙老虎看門口，盞嘥氣嘅咋。試諗吓，如果被釘牌嘅旅行社借屍還魂，改名經營，當局有辦法阻止咩？惡導遊劏客，當局又可以杜絕咩？咪話功夫茶以君子之心度小人之腹吖，旅議會自己人管自己人，如果世通單嘢唔係搞到咁大，當局都未必會做嘢啦！
一句講晒，要杜絕旅遊業亂象，設立旅遊業監管局至係治本之道。話晒係官方機構，有執法權力吖嘛，唔打得都嚇得，點都好過無牙老虎連嚇人都無力。但可惜吖，港府決而不行，旅監局法案預計七月至提交立法會，以港產官僚嘅拖拉作風，隨時又唔知搞到幾時至成事，各位旅客喺旅遊巴瞓陣先啦。
講起上嚟，旅客住宿貨不對辦，世通要釘牌，咁監管旅遊業貨不對辦，港產官僚係咪都應該釘牌呢？遠嘅唔講吖，三年前惡導遊阿珍劏客搞到香港旅遊業個朵臭晒，港府當時誓神劈願要清除行業亂象，點知事隔三年嘞，問題未解決，反而變本加厲添，咁點算先！
嗱，旅行畀人賣豬仔，郵輪遊客跳海抗議，但如果成個旅遊業畀人賣豬仔，搞到亂七八糟，自拆招牌，咁就分分鐘跳海都唔掂o架。係人都知，旅遊業係香港四大經濟支柱之一，萬一搞冧咗，港產官僚唔使跳海，自動潛水消失啦！
總之，旅業監管不改善，旅社釘牌也枉然。唔該港產官僚畀多兩錢肉緊，杜絕旅業醜聞啦，如果你哋真係畀人釘牌，咁就羞家嘞！