警務處處長「一哥」曾偉雄平時個樣木木訥訥，原來佢係個冷面廚神。一哥尋日同傳媒午宴時話，自己最叻煮西式「快餐」，正當大家估緊「一哥撚手快餐」係煎腸仔定煎蛋之際，先發現佢嘅時間觀念有異於常人，而佢嘅「快餐」定義亦同大眾理解唔係太相同，事關呢個「快餐」要等個半鐘先有得食，真係少啲耐性都唔得。
一哥呢味「個半鐘快餐」就係紅酒炆牛肉或羊肉，唔用紅酒亦可用白酒。調味方面，一哥話醃料可免，重點係畀足時間將湯汁慢慢收乾，用中慢火炆個半鐘，之後灑少少海鹽，再加少少糖吊味，個半鐘就有得食。一哥煮「快餐」都咁有耐性，難怪佢對住示威者都咁鍾意慢火烹調，亦解釋咗警方等足一頭「幾個月」先落案起訴都唔叫秋後算帳嘅邏輯。
一哥話，請人食飯唔使豪華，首重誠意，而警隊外訪亦都以實而不華做大原則。好似近期警隊外訪新西蘭就拒絕坐商務客位，搞到空姐見到咁多阿Sir排排坐經濟客位都打咗個突。原來商務客位貴經濟客位足足兩倍，呢個安排係為令有更多同袍有機會到外地交流，相比廉政公署大花筒豪華外訪，警隊算係慳家。