政情：外訪團費重皮 議員諗過算過
今屆立法會復會唔夠半年，已經先後有兩個外訪團成行，包括英聯邦議會聯合會英國分會嘅兩星期工作坊，同埋由環境事務委員會喺復活節舉行嘅南韓首爾外訪團。其中首爾外訪團就有十幾位議員報名，民主黨胡志偉本來都想去，但佢就嫌一萬七千五百元團費太貴，佔咗一屆任期五萬五千元外訪津貼三成有多，所以佢要留番啲津貼下次去遠啲喎。究竟議員係按需要去考察吖？定係一心諗住去遊埠呢？
英國之行多人爭
尋日內務委員會討論上述兩項外訪安排，非環境事務委員會成員嘅民協馮檢基突然又話想去首爾訪問團，搞到內會最終決定要將外訪一事發還委員會傾吓先。至於英聯邦議會聯合會英國分會邀請本港議員去倫敦威斯敏斯特議會參加工作坊，會期定於六月十七至廿七日舉行，主題包括議會常規程序同埋公共帳目委員會。由於工作坊嘅名額只有兩個，但有七位議員報名，行政管理委員會早幾日召開特別會議，商討派邊兩位議員參加。
據了解，委員會根據英聯邦議會嘅建議參加準則，首先揀咗帳委會副主席、會計界梁繼昌（Kenneth）。由於Kenneth係男性泛民主派議員，行管會於是就揀番個建制派女議員參加，而由於建制派得民建聯葛珮帆（EQ）一個女議員報名，所以EQ就自動入選喇。