政情：剪布必殺技 打謝泛民

僅審核已花408個月

鑑於泛民之前就政府架構重組、長者生活津貼喺財委會上玩「拉布」，民建聯就喺今屆立法會一開波就提出「剪布」議案，引發泛民揚言要就呢個議案拉布拉足四年，仲反擊提出一百九十幾萬項修訂。秘書處預計，要用四百零八個月先至可以審核完畢，兼且要花二百日去表決。

立法會秘書長陳維安坦言，議員用電郵提交修訂，依家連開啟電郵都有困難，就算開到都有排睇。雖然可以考慮請臨時工幫手開電郵，但審批嘅工作始終都要搵番秘書處同事去做，到頭來都係唔知點算好。

秘書處尋日就邀請傳媒一齊諗計破一百九十幾萬項修訂，有人建議最直接嘅方法就係叫張宇人學吓立法會主席曾鈺成咁狠狠「剪布」，裁定議員嘅修訂瑣碎無聊而不獲接納。不過，如果立此先例好易孭鑊，分分鐘會備受批評，所以要張宇人好抵得諗先至得。另一個方法就係橫掂都開唔到啲電郵，不如就報警話立法會電郵被侵襲，等警方拘捕今次行動嘅中堅分子社民連「長毛」梁國雄，咁就一了百了。

擬改議事規則抗衡

其實上述兩項計謀都未必咁易成事，反而仲有一個切實可行嘅必殺技，就係修改議事規則，要求議員提交議案一定要用白紙黑字，仲要每份親筆簽名，提交時仲要親身到秘書處讀一次核實。咁樣議員淨係簽名都簽到手軟啦，「拉布」變相整蠱自己，加上大量影印既唔環保又會浪費公帑，泛民議員或會備受批評，遇到連番阻力，相信佢哋會知難而退喇。