中環出更：蕭炎坤低調派帖
人生悲喜無常，博愛醫院前主席蕭炎坤（Sidney）體會至深，事關佢外甥女關佩雯同丈夫蕭志文日前魂斷埃及，家人仍未走出哀痛。一向支持慈善嘅Sidney同做過博愛總理嘅大仔蕭文豪（Simon），前晚現身博愛醫院嘅年度晚宴。經常笑容滿面嘅Sidney，成晚神情凝重，席間見佢低調派帖畀老友，原來係佢嘅細女蕭文玲本月底將出嫁。Sidney短時間經歷悲與喜，不免慨嘆人生如戲。
甥女剛逝 逢月底嫁女
卓妮上前同Sidney打招呼，講到近排家事紛擾，佢唔想多講，只話要低調，至於當晚兩仔爺出席晚宴係要撐博愛。Sidney育有一子兩女，大仔Simon及大女早已成家立室，並為佢添咗幾名乖孫，依家細女終於覓得好歸宿，身為爸爸梗係好開心。不過天意弄人，Sidney胞妹嘅女兒及女婿突然遇難，身為舅父嘅Sidney悲痛唔使多講。不過悲傷還悲傷，日子還要走下去，希望家屬們節哀順變。
卓妮