中環出更：港區政協上京多嘢帶
全國人大政協兩會分別於明日及下周二揭幕，新一屆港區全國政協委員尋日陸續啟程前往北京，令平日冷清嘅機場貴賓室通道變得好熱鬧。北京天氣連月霧霾不斷，又刮風沙，連外國人都將「北京咳」列為北京旅遊特色，事關旅客一落機就係咁咳。雖然呢兩日當地天氣忽然好轉，但過去積落咁多空氣污染物，又點會一兩日消散得晒吖，睇怕班人大政協上到去都係幫手吸「毒氣」喇！
過去人大政協使用機場貴賓室通道上機，都唔使預早兩個鐘去登記，但尋日好多跟大隊搭十二點半機上京嘅政協委員，都準時喺朝早十點半鐘拖住一篋二篋抵達機場，據聞係西環落「柯打」叫啲政協新丁準時集合，莫非係要喺上京前先行簡報？準時集合嘅政協新丁、鄉議局執委劉業強就由太太葉愛愛同囡囡送機，而劉太就幫老公打點一切，預早執定啲冬蟲草沖劑同潤膚面霜畀老公，夠晒體貼。
盧文端帶埋貴州茅台
不過，同樣係政協新丁嘅恒生銀行前女大班梁高美懿就冇聽西環「柯打」，十一點十分先至抵達機場，佢話今次上京帶備潤膚霜補濕同川貝潤喉，認真滋陰。至於另一政協新丁前政務司司長唐英年更加選擇搭下午三點鐘班機，應該上到去就夠鐘食晚飯直落。另外，卓妮朝早亦分別見到廣東社團總會主席王國強、中華總商會前會長蔡冠深、資深大律師馮華健啟程上京。
有政協話，其實依家北京乜嘢都有，都唔使特別帶咁多嘢上去，但福建幫頭領盧文端就依舊帶備一大箱貴州茅台酒上京宴客，莫非正如傳聞所言，佢驚被上面啲飯店劏到一頸血？
卓妮