政情：股壇長毛「瘋狂財爺」上身
有「股壇長毛」外號嘅獨立股評人David Webb，繼早前抗衡《公司條例》限制公眾查冊嘅條文後，尋日又「財爺」上身，喺個人網站發表首份另類財政預算案。佢一向主張自由市場經濟，當然同政府大唱反調啦，除咗提倡一刀切廢除印花稅外，更建議劃一稅階及稅率，年薪廿萬元以上嘅市民先需要交稅，稅率劃一為百分之十四，真可謂「瘋狂財爺」！
提倡自由市場經濟
David Webb認為，香港有今時今日嘅成就全靠自由市場經濟帶動，佢提倡政府放棄資助或以任何形式干預一切商業活動，包括停止向中小企批出貸款、要開放巴士專營權等。佢又話，徵收印花稅會影響市民買賣物業嘅意欲，理應一刀切撤銷。其餘「瘋狂」措施包括豁免汽車首次登記稅，停止兩元乘車優惠及擴展學券制度至全港所有學校等。
呢位瘋狂財爺喺大刀闊斧撤銷作為政府主要收入來源嘅稅項時，有冇諗過每年逾千億元嘅政府開支由邊個埋單呢？政府呢頭先預告來年度經常性開支將會大增，若果港人採納David Webb呢份「自由奔放」嘅預算案，睇怕幾千億元盈餘眨眼就使晒。唔知真正嘅財爺鬍鬚曾會唔會睇到眼都冤呢？