政情：高佬賢高永文有「距離」
漁農界立法會議員何俊賢（高佬賢）位於元朗嘅首個地區辦事處尋日開幕，除咗民建聯一眾領導及立法會議員捧場外，入境處處長陳國基同食物及衞生局局長高永文都到場主禮，仲有近百名漁農業界好友出席。不過，最搞笑嘅係，好多業界好友帶咗自己嘅漁農產品去做賀禮，有本地雞、豬、魚、有機蔬果等，完全係開正向來為食嘅高永文嗰瓣，難怪佢對食品讚不絕口。
獲漁農產品做賀禮
高永文話，魚有魚味、雞有雞味，尤其啲紅菜頭非常鮮甜，唔講仲以為佢推銷緊「本地有機食品嘉年華」。由於高佬賢個辦事處面積只有七百呎，容唔落一百多名賓客，所以佢就借用附近一間中學嘅課室搞開幕儀式。開始時首先由身高六呎三吋嘅高佬賢致歡迎詞，佢咁高，在場工作人員梗係要校高支咪啦，但就搞到較矮嘅高醫生致詞時要校番低支咪，仲忍唔住笑話：「低啲、低啲、低啲」。
高佬賢話，今次揀喺元朗開辦事處主要係方便元朗同屯門嘅農業業界，等業界可隨時去搵佢敍吓。另一原因係佢自小喺新界西長大，依家又住喺元朗，所以對個區有深厚感情喎。