政情：老將梁耀忠做領跑小Q
今日係一年一度嘅馬拉松盛事，往年都有唔少立法會議員參加，但部分人唔係臨陣縮沙，就係跑跑吓唔見咗人，今年仲有議員改變角色。街工梁耀忠（阿忠）跑咗十幾年全馬，可以話係馬拉松嘅常客，但佢今年就會化身為日本嘅催淚電影角色「導盲犬小Ｑ」——搖身一變成為「馬拉松小Ｑ」，佢會做領跑員帶領一個失明十幾年嘅男跑手跑半馬賽事。阿忠坦言：「領跑仲辛苦過自己跑！」
現年六十歲嘅阿忠跑咗馬拉松十幾年，年年都係跑全長四十二公里嘅全馬賽事，仲跑足全程冇甩拖，稱得上係老將。不過，阿忠今日就會獻出第一次做領跑員，帶領一位因為視網膜脫落而失明咗十幾年嘅男跑手一齊挑戰半馬賽事。阿忠話，佢同呢位失明跑手練習咗五、六次，發現原來領跑係辛苦過自己跑好多o架，「以前自己鍾意快就快、慢就慢」，但因為今次要同拍檔配合，所以佢要就番拍檔嘅步伐。
郭家麒腳傷要諗吓先
不過，阿忠覺得最困難嘅都係經常被人碰撞，唔明點解啲非失明人士反而跑步唔帶眼喎，希望今日啲參賽者要小心啲、留意吓身邊嘅人，避免撞埋一團。除咗阿忠，有幾個議員都有報名參加，包括之前因為身體不適入過醫院嘅民協馮檢基，但佢只係跑兩公里嘅領袖盃賽，仲短過三公里輪椅賽。至於往年有跑開嘅郭家麒，喺一個月前因為跑斜路練持久力而整傷隻腳，痛到上唔到樓梯，所以佢係咪參加今日賽事都仲要觀望吓先喎。
有人辭官歸故里，有人漏夜趕科場，講緊嘅係體育、演藝、文化及出版界議員馬逢國，原來佢兩年前都曾報名參加，但最終都因為事忙而甩底，所以佢今年的起心肝，誓言一定要落場，對自己有個交代。不過，佢事前未有正式練習過，仲話會同囝囝一齊跑十公里，但囝囝就講到明唔會等佢。被問到會否又臨陣退縮，馬逢國就口響響話︰「十公里之嘛，跑唔到最多咪行埋佢囉！」