中環出更：葛珮帆粗心畀老公詐型
立法會議員工作出名繁重，因公忘私絕不出奇，有時忙到連家中細節都冇為意，惹來另一半嘅不滿，講緊嘅係立法會議員葛珮帆（EQ）。話說EQ尋日喺西貢同傳媒團拜，席間自爆被老公投訴，佢話老公喺農曆新年前趁佢外出時，就乘機換晒房間嘅窗簾，仲諗住一路唔出聲畀個驚喜佢，點知佢一直冇發覺，終於到年初一時，佢老公就忍唔住自爆呢個「驚喜」，EQ之後先至補鑊走入房間大讚新窗簾，又慢慢左睇右睇。
用圓籠年糕茶粿團拜
EQ尋日再提起呢件事時都忍唔住笑，解釋主要係因為新舊窗簾顏色好似，又呼籲大家應該留意多啲屋企嘢喎。講番個團拜，EQ認真有心，雖然佢本身食素要自備素菜，但都搵咗啲風味盆菜畀大家食，另外又搵咗師傅預備圓籠年糕同茶粿款客。講開呢個年糕認真唔嘢小，有成四、五十公斤重，又要蒸二十小時先至熟透，唔好以為熟咗之後就一勞永逸，如果要切開佢時，基本上都要兩個人夾手先至切得開。
卓妮