中環出更：為監察錶換電 陳智思要「量心」
行政會議成員陳智思（Bernard）一向有做運動習慣，所以多年來都保持健碩身形。卓妮日前行經中環ifc商場，咁啱遇到Bernard行入一間美國健康及運動用品專賣店，但最後佢都冇買嘢就離開，唔通睇唔啱心水？原來係佢用開嘅一隻運動心率監察手錶冇電，專程去舖頭換電池啫。
當日下午四點，卓妮見西裝骨骨嘅Bernard一支公行入嗰間運動用品專賣店，店員隨即好熱情咁招呼佢，雙方有傾有講，睇嚟佢係熟客。入到去，Bernard喺褲袋度拎咗隻手錶交畀店員，跟住就見店員用螺絲批拆開嚟睇。期間Bernard喺店內四圍望，尤其對運動產品特別有興趣，仲托住個腮咁定神研究。
免運動超心臟負荷
大約十分鐘後，店員將隻錶交還Bernard，佢就好滿意咁離開。卓妮上前同Bernard打招呼，佢話手上隻錶係運動專用嘅心率監察錶，跑步時可以計時兼量心跳，可以更了解自己嘅身體狀況。其實Bernard自十八歲就患有高安氏動脈炎，過去已多次進行「通波仔」同「搭橋」手術，所以有隻心率監察錶，可避免運動令心臟負荷過重。
卓妮聽到Bernard把聲有啲沙，佢話近排講嘢講得多所以喉嚨痛，要好好休息吓。講開之前過農曆新年，Bernard先飛泰國再過新加坡，事關爸爸陳有慶係泰國華僑，而太太就係新加坡人，兩邊都去勻晒，真係照顧周全。
卓妮