立法會議員梁美芬向來創意無限，繼捉鼠揚名贏得「鼠王芬」美譽，日前立法會大會上討論建造業人手短缺時，建議將建築工人改名為「城市美容師」，佢話如此這般可以洗脫建築行業辛苦兼冇前途嘅負面形象喎。有鼠王芬咁嘅代議士，立法會雖然經常爭拗啲無謂議題，卻娛樂性十足，又點會悶啊！
鼠王芬睇怕相信改名可以轉運，老朽建議佢改名「梁票后」，則肯定可以屆屆當選，繼續在議事堂風騷論政。
建築工人短缺，主因多項大型工程上馬，加上內地城鄉巨變，在在需要建築工人，建築工人嘅人工近年已大大增加，建築行業人手短缺，肯定不會因改名為「城市美容師」就會霎時人手充裕，而做建築工人，何以會有負面形象？喂，梁議員，憑雙手靠勞力體能搵食，尤其在夏日高溫下修路鑿橋嘅工人，更加值得吾人尊敬！依鼠王芬嘅思考邏輯，如果改名就可以建立形象兼有前途，咁清潔廁所嘅易名為「化妝間噴香師」，通渠工人易名「地下霹靂大師」，豈不是個個爭崩頭去做？
一個人要尊嚴地活着，有時唔係改個名易個號就掂！《史記》寫項羽在楚漢相爭的對決中，烏江畔，四面楚歌，項羽此時並非絕無生路，然而，他沒有投降，又不屑逃跑，「烏江不是無船渡，恥向東吳再起兵」──項羽決絕地拔劍自刎，用一腔熱血染紅了「尊嚴」兩字！項羽的例子不知會不會改變鼠王芬對「形象」的看法？
尊貴嘅梁美芬議員，「建築工人」正是毛澤東所歌頌的勞動人民，他們是創造歷史奇迹的動力！「城市美容師」太娘娘腔了！