政府官員落區推銷政策係爭取市民支持嘅指定動作，不過有出名係「獨立王國」嘅公營機構自恃人強馬壯，做嘢異常甩轆。
有一次邀請局長級高官推銷千億元基建項目，更拒絕政府新聞處插手公關工作，活動淪落到零傳媒出現，公關臨時臨急再通知傳媒到場，高官就無辜苦等兩粒鐘！
話說該機構行事向來儼如「獨立王國」冇王管，「國王」年薪仲高過特首添，點知舊年三月一場記者會就露餡。某高官原本獲「國王」邀請推銷基建項目，「國王」更另聘公關公司負責統籌工作，繞過做慣做熟嘅政府新聞處。誰不知記者會當日，在場除咗「國王」同工作人員外，竟然一個記者都冇，嗰位高官眼見一張張空櫈頓時眼冤！
自知闖禍嘅「王國」公關主管即時打晒鑼咁通知傳媒嚟採訪，記者會最後喺高官呆等兩個鐘後，由零星記者充撐下草草完成。原本等收大信封嘅闖禍主管，幾個月後更趁嗰位高官退休，一個轉身就復職，「國王」更請多個電視台記者做佢助手添，真係荒謬！