一個成功企業家通常都日理萬機，每分鐘都係錢。但「電鑽大王」兼工業總會主席鍾志平（左），原來細細個已經開始唔戴錶，寧願周圍問人幾點鐘。所以佢啲朋友成日笑佢唔會遲到，因為連佢自己都唔知幾多點。
不過呢個習慣，鍾志平○八年開始打破，當時佢買咗人生第一隻錶，咁啱呢隻錶又係工總副主席、有「鐘錶大王」稱號嘅劉展灝（右）旗下製造，由於兩人老友鬼鬼，所以鍾志平帶到依家都唔捨得換第二隻錶，話既然係老友品牌，一定係好嘢喎。
工業總會係本地老牌商會，CY下周三公布《施政報告》，唔知兩位工總主席點睇呢？劉展灝就最老實，話過去幾年對施政報告都好大期望，但最終令佢好失望，所以今年學精咗，唔敢有期望嘞。鍾志平就講得有少少晦氣，話CY今年都講明份施政報告有五大方面，但呢五方面都無講「工業」兩字，所以佢會以「平常心」對待，費事激親自己喎。
（張家灝攝）
