政情：公民講場：縱容地霸 貪曾埋彈30年

申訴專員公署尋日踢爆沙田排頭村一幅官地，長年畀人非法霸佔用嚟做停車場，狠批地政總署同民政事務總署等多個政府部門，多年來縱容懶理、互相卸責，其中運輸署仲用公帑幫呢個非法停車場整靚個出入口，照顧周到，極度離譜。調查透露該處嘅非法泊車同無王管問題，早喺八十年代出現，八十年代初嘅沙田政務專員係邊個？之唔係「貪曾」前特首曾蔭權爵士囉！佢喺做政務專員時埋下呢個政治炸彈，都唔知當中有無涉及貪腐問題，到後來出任政務司司長同特首時，亦無協調好相關部門拆彈解決問題。呢個炸彈埋咗卅年，如果早一年爆炸就炸中佢啦。