唔少人鍾意瀏覽社交網站facebook（fb），都係貪佢溝通方便、快捷、接觸面廣。中華廠商聯合會日前喺fb開設咗個名為「The CMA」嘅帳戶，話係為咗方便會董同傳媒友好查閱該會嘅最新資訊。
不過呢個帳戶並非人人有資格加入，想同佢哋做網上朋友唔係喺網頁上提出邀請，而係要填申請表，再傳真返去等佢哋篩選。
我哋收到該會發出嘅一封電郵，邀請我哋加入成為該會fb之友，但程序相當繁複。會方要求申請者先填妥隨件附送嘅表格，包括姓名、電話、電郵地址、fb帳戶及簽名，然後傳真至該會秘書處。跟住要等秘書處收到傳真，並對申請者發出邀請，再由申請者確認有關邀請，雙方先至正式成為朋友。
廠商會秘書處就話，佢哋咁做係有原因嘅，事關佢哋想利用fb呢個平台，搞一個正式發放相片同消息嘅渠道，等佢哋嘅會董可以放心將相片放上去，而唔使擔心畀一啲唔認識甚至惡作劇嘅人將啲相片挪用。網上世界太虛幻，原來有啲時候，都係要借助紙張。