一共五人缺席
怪醫話自己冇投票，但唔代表自己唔做嘢。佢強調如果CY下星期份施政報告冇任何醫療政策，尤其係檢討醫管局嘅資源錯配問題，佢一定冇面畀，會喺致謝議案的時候投下反對票。
其實前日彈劾梁振英嘅動議中，一共有五人缺席投票，除咗梁家騮外，自由黨榮譽主席田北俊同黨友張宇人都唔見咗，雖然兩人都有向立法會請假，講明自己唔會投票，但究竟去咗邊就冇人知喇，只係知佢兩人都分別飛咗去外地。其餘兩人就係民建聯鍾樹根同經民聯劉皇發。鍾樹根因為身兼哈爾濱政協，所以日前要飛咗去哈爾濱開會；而發叔就大病初愈，雖然已經出院，但佢黨友林健鋒「批准」佢老人家休息多一排，唔使咁急返去立法會住。