政情：立法會兩度險流會 唔夠法定人數
上屆立法會因為議席出缺安排不斷拉布而幾度流會，其實全體會議周不時都唔夠人開會，只不過冇人提出要數人數就算了，尋日嘅大會前後兩次點算法定人數，好彩最終有驚無險唔使流會。
立法會尋日朝早九點正續會，當主席曾鈺成講咗唔夠兩句，人民力量陳志全即刻企起身要求暫時停止會議點算法定人數。其實今屆立法會大會已經試過幾次要求數人，所以初時秘書處同議員仲氣定神閒以為實無事，財經事務及庫務局局長陳家強仲走咗去同議員嘻嘻哈哈傾偈。
急call議員湊夠腳
點知隨住時間一分一秒咁過，大家先發現愈來愈唔對路，點都數唔夠三十五人，企喺門口負責數人頭嘅秘書處人員即時「急call」議員返嚟開會，仲打電話叫泊緊車嘅謝偉俊即時丟低架車上去湊夠數先。
午飯之後，社民連梁國雄再次要求主席數人，好彩民建聯一班議員只係去咗離會議廳三十步之遙嘅宴會廳食飯，所以扒咗兩啖飯就拿拿臨返去「湊腳」，好快就齊腳過骨。