政情：蔣麗芸CY 翻出廿年情
民建聯立法會議員蔣麗芸（Ann）初入議會已經頻頻以驚人發言火速上位，前日立法會辯論彈劾特首梁振英（CY）議案，阿Ann為CY全力護航，發言時簡直七情上面，仲爆出「男人結婚周年紀念日都記唔清，何況個花棚？」嘅金句，令工黨議員李卓人都不得不慨嘆「我都知愛情係盲目嘅」。阿Ann嘅發言引起好大回響，甚至有市民懷疑阿Ann係咪暗戀CY，仲將佢哋廿年前一齊主持節目嘅片摷番出嚟。相識咁多年，唔怪得阿Ann咁撐CY啦。
阿Ann「真情」引起討論
阿Ann辯論彈劾議案時力撐CY，佢嘅發言聽到大家喺寒寒冷冬之中汗都滴埋，李卓人慨嘆愛情盲目時都不得不讚阿Ann真情流露，有佢可愛嘅一面。不過阿Ann嘅「真情」就惹起唔少市民懷疑，有市民尋日就打電話上電台節目話︰「我覺得佢（Ann）心入面係仰慕梁振英、愛慕梁振英，好似女朋友撐男朋友咁，話佢做咩都唔係有心、係為大家好咁。」亦有自稱喺選舉時投票畀阿Ann嘅聽眾話覺得阿Ann滿口歪理好離譜，好後悔投票畀阿Ann，仲話要喺元州邨發起簽名運動要求阿Ann落台咁話。
曾經一齊主持節目
喺呢個時候，有網民就摷咗段片，「揭發」咗阿Ann同CY嘅廿年情。原來阿Ann同CY喺九○年曾經一齊主持香港電台一個叫《亞洲經驗》嘅節目。節目主要講各地經濟發展，當時嘅CY說話時已經好流利，間唔中仲展現充滿自信嘅笑容。而坐喺CY隔籬嘅阿Ann雖然有啲口窒窒，但尚算斯文淡定，不過就同依家振振有詞嘅佢簡直判若兩人。
阿Ann尋日就話，其實佢都可以喺發言時照稿讀足十五分鐘，不過啲人成日話建制派發言好悶，佢先至加啲抑揚頓挫，等睇電視嘅市民都冇咁悶咁話，真係用心良苦。阿Ann又澄清原來成日唔記得結婚紀念日嘅係佢自己，唔係老公咁話。而阿Ann老公梁海明就大讚老婆發言精彩，仲話佢哋日日都係結婚紀念日，唔使成日記住。梁海明咁骨痹嘅回應，市民對阿Ann同另一位梁生之間嘅關係，應該唔會有乜嘢聯想啦。