政情：李遠康20歲仲要阿媽剪指甲
要事業成功，好老套講句，都係要有抱負。翠華茶餐廳老闆李遠康二十歲人仲要媽媽幫佢修剪指甲，忽然領悟到衞生嘅重要，從而建立抱負，以至現在成為上市公司主席。
要改革茶餐廳陋習
李遠康尋日喺一個研討會上話，佢自幼家境清貧，年紀小小就投身社會，廿歲已進身餐廳大廚，但對於行業中陳規陋習卻渾然不覺，例如廚工衣着懶得清洗，侍應不修邊幅，甚至食煙飲酒講粗口。直至有一晚佢媽媽趁佢好夢正酣，唔抵得為佢修剪過長嘅指甲，李遠康至驚覺衞生嘅重要，從此明白茶餐廳予人地踎嘅印象必須改變，於是為餐廳引入現代化管理，培訓員工專業形象，為顧客提供整潔舒適嘅進食環境，終於有今時今日嘅翠華。
雖然李遠康揚棄舊日嘅茶餐廳文化，但係對於前人嘅經營方式仍然相當佩服，佢話往日茶餐廳有好多術語，例如烘多士叫「火燒床板」，滾水蛋喚作「師姑跳海」，阿華田又名「敗家仔」等，佢話呢啲術語喺欠缺電腦嘅時代，係方便侍應記憶之作，雖略帶戲謔，但亦體現當時從業員嘅智慧。