中環出更：潘偉業鄺晶晶 拉埋天窗
龍年將盡，兼任青年聯會會董、菁英會成員及工業總會青委嘅玩具公司太子爺潘偉業（Albert）把握良辰吉日，與前電視台主播女友鄺晶晶（Akiko）拉埋天窗，當晚喺酒店大排筵席，近五百人一同見證呢對俊男美女共同邁進人生新一頁。Albert感激父母養育之恩，更承諾未來會盡力「啤番件識郁嘅玩具」畀父母玩添！
Albert同擔任廣東省政協委員嘅爸爸潘少忠兩父子人面廣，當晚四洲集團主席戴德豐、全國政協委員容永祺（Samuel）、建滔化工集團主席張國榮、菁英會榮譽主席洪為民、莎莎女婿陳振邦等官紳名流紛紛到賀。現場播出Albert求婚經過，原來佢趁晶晶開咪主持直播節目時，突然遞上鮮花及婚戒，認真搞鬼。
Samuel話自己同潘家相識二十多年，原來佢哋曾經做過隔籬鄰舍，住喺西環對面樓，可謂睇住Albert長大。潘少忠笑言，當年不時見到Samuel做到半夜三更至返歸，仲聞到對方淥即食麵嘅香氣，初初以為對方係「廠佬」，細問下至知佢做保險。當時佢諗，人哋做保險都咁勤力，自己都唔可以偷懶，最終做大咗間廠，佢好感激Samuel激勵佢。
新翁潘少忠「重女輕男」
今次宴會場地布置由兼營婚宴公司嘅Akiko一手包辦，佢嘅新婚願望係增肥，調理身子再努力造人。榮升新老爺嘅潘少忠對新抱讚不絕口，話佢人靚口才又好，畀足一百分。恨抱孫恨到發燒嘅佢話，起碼要佢哋生兩個，仲笑稱自己「重女輕男」，皆因佢膝下只有兩位公子，希望可以抱到女孫，已預備咗「金多寶」獎金贈予新抱喎。
卓妮