傳聞中嘅商場咁啱進行緊大裝修，雖然佢坐落於寸金尺土嘅銅鑼灣鬧市，如果富豪飯堂真係搬咗過去，唔止可以帶旺人氣，仲可以吸引多啲高檔商戶落戶，提升商場檔次，可謂百利而無一害。
我哋問過一哥究竟大地產商向佢招手係咪真有其事，佢就話不便評論。聽聞一哥已收到業主通知，九月租約期滿後就會收舖，但到時究竟係搵地方另起爐灶，定係索性光榮結業，到依家都仲未有定案。事關一哥年事已高，早已處於半退休狀態，而且尖沙咀仲有間阿一海景飯店，一哥交畀拍檔兼入室弟子打理，一哥經常要兩邊走。
在商言商，除非大地產商用超乎想像嘅誠意價招租，否則一哥幫人哋帶旺個場之後，過多幾年又被人狂加租，到時又要搵舖位搬遷，真係連裝修都蝕埋。