前日天氣轉凍，尋日更係本世紀以來最凍嘅除夕，個個出街都包到成隻糉咁，寒風颯颯之下出現唔少溫情畫面。奧運滑浪風帆金牌得主「風之后」李麗珊前日獲邀出席精英運動員慈善愛心跑活動，佢拉埋老公黃德森及一對寶貝女齊齊捧場。當日氣溫只有攝氏十度，珊珊走到台上主禮，坐在觀眾席嘅兩個愛女就凍到變雪條，就算攬埋一齊取暖，都依然騰騰震。爸爸黃德森見狀，即刻化身「人肉暖爐」，抱起兩個女坐喺大髀上，再用羽絨包實晒佢哋，充分體現父愛嘅偉大。
（袁志豪攝）
