政情：公民講場：港人渴求廉潔 ICAC要快啲查貪曾
「貪曾」前特首曾蔭權爵士任內爆出連串貪腐醜聞，包括貪盡富豪海陸空款待，食盡省港澳，廉租富豪深圳豪宅，仲有唔知貪埋幾多不為人知嘅着數，搞到香港烏煙瘴氣，不但令香港喺國際上嘅廉潔度排名下跌，尋日仲有大學民意調查顯示，希望香港成為一個廉潔乾淨社會嘅市民人數，創下近二十年來新高。想當年貪曾經常以廉潔政府掛在口邊，強調呢個係香港一向引以為傲及核心價值之一，估唔到依家又由佢一手破壞。廉政公署過往嘅宣傳口號係「香港，勝在有ICAC」，希望廉署真係快啲採取行動調查貪曾，回應市民嘅訴求。
