被指係「西環契仔」嘅立法會議員謝偉俊（Paul）日前接受電視台訪問時親口證實中聯辦喺選舉中幫過佢，真係好講唔講，此話一出，民主黨（白鴿黨）尋日就擒擒青去北角廉政公署投訴，話中聯辦干預香港選舉，涉嫌違反《選舉（舞弊及非法行為）條例》。阿Paul就澄清話，雖然參選得到中聯辦支持，但不涉及開支。不過，香港中通社就阿Paul嘅言論向中聯辦有關部門負責人查詢，負責人話阿Paul嘅說法係毫無根據嘅。
白鴿黨成員尋日拉晒橫額咁去到廉署總部，投訴中聯辦介入香港內部事務、干預選舉，又話阿Paul都承認受過中聯辦幫助，應該會產生一定選舉開支，但呢筆開支阿Paul並冇申報，所以認為中聯辦即係涉及違反選舉條例咁話喎。
阿Paul今次衰多口搞到中聯辦被人投訴，就算真係幫咗佢都惹麻煩，點知佢仲死撐話︰「成日都話要坦白，坦白都有代價嘅！」
阿Paul又話，如果有啲人係要捉字蝨、無中生有，相信好多人都好唔得閒，希望白鴿黨告人之前要有真憑實據，唔好嘥納稅人啲金錢。其實佢唔亂咁講嘢，咪唔使被對手抽後腳，搞到添煩添亂囉。