政情：EQ遊埃及感受多多 以為去咗印度
民建聯立法會議員葛珮帆（EQ）之前聖誕假陪咗老公去埃及旅行，原來佢七年前已經去過埃及，今次故地重遊最大嘅感受係，埃及好似比七年前更加破爛，垃圾處處，塞車依然，搞到佢懷疑自己去咗印度喎！EQ之前已講過對對埃及嘅印象麻麻，事關當地嘅檔販成日纏住遊客兜售，點知今次去到連佢老公都被檔販拉住唔放，為旅程添加一份驚險情節，唔知EQ以後仲敢唔敢再去埃及呢？
圓心願遊神廟
今次埃及之旅，EQ特登去咗埃及著名嘅阿布辛貝神廟（Abu Simbel）參觀，原來佢一直都好想去神廟參觀，可惜上次唔夠時間去，今次可以一遊神廟，心情非常興奮，佢仲話，神廟入面有啲女神好似着住透視衫咁好搞笑喎！阿布辛貝神廟由拉美西斯二世建成，六十年代因為要起水壩，當地政府就將成座神廟切割成多個部分，再搬到高出水位六十多米嘅後山上裝嵌復原，現已被聯合國教科文組織列為世界文化遺產。
EQ大呻呢幾年選舉一個接一個，原本去年區議會選舉後應承陪老公去旅行，老公仲好開心訂好晒機票同酒店，但點知最後都係因公事而無法成行，搞到老公要好冇癮咁一個人去玩，所以今次無論去邊都好，最緊要都係佢老公開心啫。