政情：獲委消委會主席 黃玉山否認係「梁粉」
特首梁振英（CY）上場後，好多支持過CY嘅「梁粉」獲邀做官員、公職人員或加入政府諮詢組織。不過，最新獲委任為消費者委員會主席嘅科技大學副校長黃玉山日前出席一個活動時，就伸冤話自己唔係「梁粉」，事關CY當選後，都冇乜同佢傾過偈，而邀請佢做主席嘅係商務及經濟發展局嘅官員，佢考慮咗一星期才應承，所以被稱為「梁粉」實在好無辜，仲強調自己純粹希望服務市民。
自稱夠料應付新工作
雖然黃玉山獲委任為消委會主席只係呢幾日嘅事，但佢似乎已經做足準備。佢話怕被人話佢唔稱職，所以當有官員邀請佢時，就即刻翻查相關網頁，了解消委會嘅職能同架構，再衡量自己作為大學副校長及港區全國人大代表嘅工作量。佢同時又翻查過紀錄，大部分以往做過消委會主席嘅人士都係學者，隨住時代轉變，相信消委會以後唔少工作都會同佢研究嘅生物化學等範疇有關，相信可應付到呢份工作。