中環出更：港人膺世界傑出華人設計師
香港人才輩出，繼周仰傑、羅啟研、靳埭強等為人熟悉嘅著名設計師之後，現任雷諾（Renault）汽車外觀設計副總裁嘅著名香港汽車設計師羅偉基（Anthony），近日獲香港設計中心選為年度「世界傑出華人設計師」，喺車壇上續為華人爭光。
理工畢業後讀汽車設計
現年四十七歲、已移居瑞典嘅Anthony，係土生土長嘅香港人，佢從事汽車設計已經有二十幾年，自細就夢想成為汽車設計師。當年佢喺理工工業設計系畢業後，再赴倫敦英國皇家學院攻讀汽車設計，第一份工就喺英國蓮花（Lotus）汽車擔任設計師，歷年來先後為奧迪（Audi）、紳寶（Saab）等國際知名汽車品牌設計過唔少靚車，佳作遍布多個國家及地區，卓越嘅表現備受肯定。
Anthony嘅代表作係Saab Aero X概念車，憑住「將飛機設計理念移植到汽車設計領域」嘅創新意念，被冠以「年度概念車」嘅美譽，佢亦因此曾獲雜誌評選為亞洲年度設計師。
卓妮