本報日前揭發手機「間諜」程式悄悄流入市面，只需畀三十蚊向對象嘅手機「落藥」，就可以無聲無息咁遙控監察對方嘅位置、通話紀錄，甚至可以監聽、偷拍！據聞呢篇報道一出，城中唔少政商界及馬圈名人都人人自危，擔心手機畀另一半做「手腳」。我哋就此問過一啲專家，得出以下「解藥」，睇吓幫唔幫到大家。
專家話，Android手機用家如果想測試吓自己部電話有冇「中招」，可以嘗試打四粒「＊」然後打出，正常嘅話應該係打唔出嘅，相反「中招」者就會有提示話你知畀人裝咗個程式。
至於iPhone用家，最好唔好「越獄」（Jailbreak），咁就可以減低被跟蹤嘅風險。不過講到百分之百安全嘅方法，就只有唔好做啲唔見得光嘅事，咁就自然可以清者自清，心安理得喇！