前高官丁福祥回歸前做署理文康廣播司時，以「焗不熟的栗子蛋糕」形容草擬中嘅《綜合廣播條例草案》會被擱置而聞名，原來佢已經喺八年前自勞工處副處長一職退休，一直生活低調，日前竟喺一個電視節目中出現，仲要係跳芭蕾舞，真係嚇人一跳。
TVB早幾日有個節目講近年好多大人學跳芭蕾舞，訪問咗其中一個學生，佢就係丁福祥。佢今年六十五歲，吐心聲話自細就想學芭蕾舞，但一直無機會，八年前預備退休時就決定學，可以話係「老年出家」。不過，唔係話學就一定學到，佢當年查黃頁逐間芭蕾舞學校打電話去問，但一聽到佢成五十七、八歲嘅男士，都無興趣收佢，最後搵到新開嘅芭蕾舞學校，至達成佢嘅願望。丁福祥為學芭蕾舞不惜工本，早前仲參加過舞蹈學校嘅周年表演添，佢話雖然只係跳咗七分鐘，但表演前每日都幾乎練習兩個鐘，跳咗咁多年都算跳得有板有眼。
（無綫畫面）
