公民黨黨魁梁家傑（Alan）尋日帶同該黨新一屆領導層與傳媒見面，談及下屆區議會選舉部署，指該黨依家喺全港五大選區都有立法會議員，嚟緊會奉行「師徒制」，由現任立法會議員同僅有嘅數名區議員，帶住啲有志從政嘅年輕黨員學嘢，經考勤後再決定會否正式派佢哋出戰喎。
須知公民黨出名缺乏地區工作，識選立法會但唔識選區議會，上屆區選派出大批新人全軍覆沒，現有六名立法會議員，有四人從來未選過區議會，法律界郭榮鏗選過但輸咗，只得新入黨嘅郭家麒曾經喺中西區贏過，但依家佢亦已轉咗區去新界西，都唔知有乜參選心得可以同啲後輩分享囉！
