吸煙危害健康，並會增加患癌風險，社民連主席梁國雄（長毛）似乎亦深明呢個道理，近排走咗去驗身照肺，尋日去醫院攞完報告就即刻走去房署示威。長毛尋日叫口號時仍然中氣十足，而佢就話自己只係去做吓身體檢查，醫生話佢無事，叫大家唔好亂估。至於醫生有無叫佢食少啲煙？長毛就咁答：「唔叫你食少啲煙嗰個就唔係醫生啦！」簡單啲講即係意見接受，生活態度照舊。
社民連尋日一行八人去房署總部抗議署方政治審查海報，唔畀佢哋喺屋邨宣傳元旦遊行。唔知長毛係咪自己照完肺太興奮，於是就諗住去房署搵運輸及房屋局局長張炳良出嚟照肺，問下呢個「哎吔民主派」局長點解冇管好房署，任憑房署隻手遮天審查海報，阻撓佢哋呼籲市民上街示威，箝制言論自由。長毛講到興起仲話張炳良簡直就係「濕水炮仗」，即係點唔着，得個樣。不過，尋日長毛喺房署總部外等咗五、六分鐘，都唔見張炳良身影。
梗係啦！張炳良喺添馬艦返工。既然局長不在，長毛就即刻轉戰召喚署長，不過房署署長係邊位佢都唔多記得，之唔係栢志高囉。